Hindistan su böhranına qədim üsullarla çarə axtarır

Su qıtlığı və iqlim dəyişikliyi Hindistanda icmaları əsrlər əvvəl inşa edilmiş ənənəvi su sistemlərini bərpa etməyə və yenidən istifadəyə qaytarmağa vadar edir.

2025-ci ildə Hindistanın Racastan ştatının Alvar şəhərində yerləşən Moosi Rani Saqar pilləli su anbarından su 30 ildən çox müddətdən sonra ilk dəfə səkidən daşaraq küçəyə tökülüb.

1800-cü illərin əvvəllərində yaradılmış tarixi su toplama sisteminin bir hissəsi olan bu tikili böyük su anbarıdır və suya pilləkənlər vasitəsilə çıxış təmin edilir. Təxminən 0,5 hektar ərazini əhatə edən su anbarında 2021-ci ilə qədər suyun səviyyəsi qeyri-sabit olub və su ciddi şəkildə çirklənib.

Hazırda isə anbarda suyun dərinliyi 9 metrə qədər çatır. Alvar sakini, 60 yaşlı Vijay Sarsvatın sözlərinə görə, hətta ilin ən quraq aylarında belə suyun səviyyəsi nadir hallarda 6 metrdən aşağı düşür.

Bərpa edilən su anbarı göstərir ki, istiləşən və hava şəraitinin getdikcə daha qeyri-sabit olduğu iqlimdə su ehtiyatlarının idarə olunması üçün ən effektiv vasitələrdən bəziləri min illər əvvələ aid ola bilər.

Hindistanın müxtəlif bölgələrində yüzlərlə icma eyni nəticəyə gəlir. Bir vaxtlar sadəcə mədəni irs nümunələri kimi qəbul edilən və uzun müddət istifadəsiz qalan ənənəvi su sistemləri indi iqlim dəyişikliklərinə davamlı həllər kimi qiymətləndirilir.

Bu sistemlərin bəziləri min ildən artıq müddət ərzində fəaliyyət göstərib və hazırda yenidən istifadəyə qaytarılır.

Güllər Gülhüseynova