Suriya Prezidenti Şara Braziliyada keçiriləcək COP30 Liderlər Zirvəsində iştirak edəcək

Suriya Prezidenti Əhməd Şara sabah Birləşmiş Millətlər Təşkilatının İqlim Dəyişikliyi üzrə Çərçivə Konvensiyasının (COP30) Tərəflərinin 30-cu Konfransı çərçivəsində keçiriləcək COP30 Liderlər Zirvəsində iştirak etmək üçün Braziliyaya səfər edəcək.

Suriyanın rəsmi xəbər agentliyi SANA-nın məlumatına görə, Prezident Şara dünyanın hər yerindən onlarla lider və dövlət başçısının qatılacağı zirvədə iştirak etmək üçün 6-7 noyabr tarixlərində Braziliyaya rəsmi səfər edəcək. Bu, Suriyadan ilk prezident iştirakı olacaq. Liderlər Zirvəsindən sonra BMT-nin İqlim Dəyişikliyi üzrə Çərçivə Konvensiyası COP30 10-21 noyabr tarixlərində keçiriləcək. COP30-da çoxsaylı ölkələrin nümayəndələrinin, eləcə də özəl sektor və vətəndaş cəmiyyəti təşkilatlarından minlərlə şəxsin iştirakı gözlənilir.

Bu il Paris Sazişinin 10-cu ildönümünü qeyd edən COP30 iqlim öhdəliklərinin yerindəcə real nəticələrə çevrilməsinə, ədalətli və davamlı keçidin sürətləndirilməsinə və xüsusilə meşələrin, biomüxtəlifliyin və tropik ekosistemlərin qorunmasına diqqət yetirir. Sammitin məqsədi iqlim maliyyələşdirilməsini, texnologiya mübadiləsini və inkişaf etməkdə olan ölkələrlə həmrəyliyi gücləndirməkdir.

TRT Xəbər
Xədicə Məhərrəmli