“Uğursuzluqların taleyi”: Koloradonun az qala Aspenə çevrilən xəyal şəhəri

 

ABŞ-nin Kolorado ştatında, məşhur Aspen şəhərindən cəmi 15 dəqiqəlik məsafədə yerləşən Ashcroft vaxtilə böyük xizək kurortuna çevrilmək planları olan tarixi bir xəyal şəhəridir.

1879-cu ildə bölgəyə gümüş axtaran mədənçilər gəlməyə başlayıb. 1882-ci ildə Ashcroftun əhalisi 1000 nəfəri ötüb. Şəhərdə otellər, mağazalar, rəqs salonları, 14 meyxana və bölgənin ilk məktəbi fəaliyyət göstərib. Lakin bir neçə il sonra mədən sənayesinin zəifləməsi nəticəsində əhalinin böyük hissəsi şəhəri tərk edərək Aspenə köçüb.

1930-cu illərdə bir qrup iş adamı Ashcroftu Avropa üslubunda böyük xizək kurortuna çevirmək qərarına gəlib. Planlara dağda onlarla xizək yolu, kanat xətti və bir neçə xizək liftinin tikintisi daxil olub. Layihənin həyata keçirilməsi üçün 650 min dollar dövlət və federal maliyyə dəstəyi də əldə edilib. Lakin İkinci Dünya müharibəsi bu planların reallaşmasına mane olub. Tikinti üçün nəzərdə tutulan polad hərbi texnikanın istehsalına yönəldilib və layihə dayandırılıb.

Bu müddətdə xizək idmanı Aspen şəhərində inkişaf edib. Nəticədə Aspen məşhur turizm mərkəzinə çevrilib, Ashcroft isə tarixi tikililəri qorunub saxlanılan xəyal şəhər kimi qalıb.

Bu gün Ashcroft qışda xizək sürmək və qar ayaqqabıları ilə gəzmək, yayda isə at gəzintiləri və yürüşlər etmək istəyən turistləri cəlb edir. Burada müasir xizək liftləri və kanat yolları yoxdur. Şəhərin əsas cazibəsi onun sakit təbiəti, tarixi taxta evləri və keçmişdən qalan izləridir. Beləliklə, vaxtilə Aspenlə rəqabət aparan Ashcroft müharibə səbəbindən böyük turizm mərkəzinə çevrilmək fürsətini itirib. Bu gün isə onun tarixi və təbii mənzərələri ərazini fərqli turizm məkanına çevirir.

Nurgün Qənizadə