Ali Məhkəmə Trampa miqrantları Cənubi Sudana deportasiya etməyə icazə verib

Bölmə: Dünya › ,
Tarix: 13:07 24.06.2025

Ali Məhkəmə bazar ertəsi günü Prezident Donald Trampın fövqəladə müraciətini qəbul edərək, miqrantların öz vətənlərindən başqa, Cənubi Sudan kimi qarışıqlıq içində olan ölkələrə çox az xəbərdarlıqla deportasiyasını bərpa etməyə icazə verib.

 

Bu qərar Tramp administrasiyası üçün mühüm bir qələbə sayılır. Administrasiya iddia edirdi ki, aşağı instansiya məhkəməsi onun səlahiyyətini aşaraq Daxili Təhlükəsizlik Nazirliyinə miqrantlara deportasiya ediləcəkləri ölkə barədə yazılı bildiriş göndərməyi və bu deportasiyaya qarşı işgəncə qorxusu əsasında etiraz etmək imkanı verməyi əmr edib. Məhkəmənin üç liberal hakimi – Sonya Sotomayor, Elena Kagan və Ketanji Brown Jackson – bu qərara sərt şəkildə etiraz ediblər. Ali Məhkəmənin qərarı ABŞ-nin federal hakimi Brayan Mörfinin qərarını dayandırır. Mörfi qərarında hökumətin miqrantları üçüncü ölkələrə lazımi hüquqi prosedurlar olmadan deportasiya etməsinin “şübhəsiz şəkildə” konstitusion hüquqları pozduğunu bildirib.

 

Sotomayor öz etirazında administrasiyanın ümumi yanaşmasına toxunaraq bildirib ki, əksəriyyətdə olan həmkarları bu qərarla “qanunsuzluğu mükafatlandırırlar” və Tramp administrasiyasının əvvəlki məhkəmə qərarlarını “açıq şəkildə görməzlikdən gəldiyini” deyib.

“Ola bilsin ki, bu cür həyati əhəmiyyətli bir işi aşağı instansiya məhkəmələrimizin diqqətlə və məsuliyyətlə idarə etməsinə icazə vermək əvəzinə, Ali Məhkəmə indi müdaxilə edərək hökumətə dəfələrlə tabe olmadığı bir qərardan fövqəladə şəkildə azadlıq verir", – deyə o yazıb.

 

CNN News
Fatimə Heydərova